சரியும் தவறும் பொருள் மயக்கம் கொள்ளும் செல்வாவின் கதைகளில். வெளிநாட்டு டிவிடியோ கற்பனையோ சிரத்தையாய் சுரண்டாமல் சுற்றி நிகழும், பொதுவில் கவனம் பெறாத சின்ன சுவாரசியங்களையே களமாக்குவது மீண்டும் கைகூடியிருக்கிறது.
நட்பு மருவி காதல் மயக்கமும் கனவு, நம்பிக்கை தோற்று வெறுமையின் போதை மயக்கமும் உணர்ச்சி பிழம்பான அவனுக்கும் திடமான அவளுக்குமான வாழ்க்கையில் தோற்றுவிக்கும் சம்பவங்கள் நிதானமாக காட்சிப்படுத்தப்பட்டிருக்கிறது.
ஆரவாரமும் அமைதியும் விதவிதமான வண்ணங்களில் சுகம் இழையோடும் இசை பின்ணணியில் அழுத்தமாக அழகாக பதிகிறது. வித்தியாசமான கருக்களின் கதவுகளை திரையில் திறக்க பயன்படுவதற்க்காகவே தனுஷிற்க்கும் அவர் தோற்றத்திற்க்கும் நன்றிகள். தேவையற்ற “உம்”மென்றிருந்தாலும் கதறும் கண்களிலாலேயே கவனத்தை கடத்திச் செல்கிறார் ரிச்சா.
தெளிவில்லாத யாமினியின் கதாபாத்திர பின்ணணி, மிக நீண்ட அமைதியான காட்சிகள், ”இது இயல்பான படமாக்கும்” என்பதற்க்காகவே வலிந்து திணிக்கப்பட்ட தேவையற்ற வசனங்கள் என பொறுமை சோதிக்கும் குணங்களையும் மீறி கதாபாத்திரங்களின் உளவியல் அடிப்படையிலேயே காட்சிகளை பிண்ணி அதிர்வுகளையும் அழகாக்கியிருக்கிறார் - வெல்கம் பேக் செல்வா. - Nov 26, 2011
